1Cor 7 | ASO | STEP | Ido' lingine luhuvo inite' gizi huli-nidi longo' i-nidani' inite' mamu' nene lo soto' ogo lo-lengemeloze. Gililo. Ve mali'mo vene' damo hazavo' mineline' nene nesi ha lamine' o neive.

1 Corinthians 7

Paulo' Aza Vene' Daakumukisi Velo' Vaakumukisi Nene Lo-ngimine'

1 Ido' lingine luhuvo inite' gizi huli-nidi longo' i-nidani' inite' mamu' nene lo soto' ogo lo-lengemeloze. Gililo. Ve mali'mo vene' damo hazavo' mineline' nene nesi ha lamine' o neive. 2 Ne'mine o neine'za evene' muki' iga' adi'mine igi lingine vene' alusi gopo ingikelizanako nemu' nene vemoho' muki' hamo hamolite vene' di minilizani' nesi nene lamine' oloseive. Ido' vene' muki' hamo hamo' ingine velo' vanikovo' minilizani' nene lamine' oloseive. 3 Ve gaza elengahosi bizi ingalisido' o neize. Inite' ogakumu' a'manapa o damozo. Ido' vene' gaza vangahosi bizi ingalisido' o neize. Gazasi inite' ogakumu' nene a'manapa o damozo. 4 Vene' lingine okodine'mi initeto' nene gizebo amave. Asi vadinge nete gizebo i nizave. A'mine'mine ogo vemoho' lengi' okodine'mi initeto' nene gizebo amave. Asi mo eledinge netesi nene gizebo i-lingidi nizave. 5 Nemu' nene elenahoi vanahoi lingine inite' ili ma a'manapa a'manapa amilizo. O'mosola lolosive lilisine' gameneukovo' nene O'mosola gamene nanike' lolosive lilisihe li hukiki inite' ami mini O'mosola lilisine' nene lamine' o neive. Ne'mine o neine'za Satani ne'mo lengemengu' molavo inite' goloso ogato' lutine otavo moni vene' vemoho' atokisi gopo' napa ingikelisive. Nemu' a'mine gamene milasine' nene osu' lavo ma inite' nene ihe' ha ilisasive lo noluve. 6 Ido' ne'mine lo nolo-lingimuvoni' nene ne'mine mana'mine ilizave ido' amilizave lo lo huko lamuve. Langisetine nene ne'mine ilisa gili nilisave lo gele noosa nogele lingimuve. 7 Naza giluvoni' evene' muki' nene neni' uvodi'mine igi vene' dami hazavo' minilisave lo gele nouvoni'za O'moso ne'mo mino ogo molo olone' amuzote nene ato ato' lehize-lidine' nenako ne'mo ma nete nene na minuvodi'mine igi ngeli minamilisave.

8 Ido' nemu' velo' vamani' venekumukisi ido' vene' damavemukisi vene' gevonokumukisi nene naza ne'mine lo noluve: Ingine nene neni' uvodi'mine igi vene' dami velo' vami hazavo' minilizani' nene lamine' oloseiha 9 vene' vemoho' malite velo' vaa' vene' daa' amo haza minelone lisa nizavo inite' ogakumu' oko'ningu' olo' lo'mo novivo hongu li minilizado' lisihe' amani' aleve ingine nene ha velo' vaa' vene' daa' ilizave. Inite' ogakumu' okodingu' olo' laa' ne'mo goloso inite' daa' akau' lengele'mize molaloseinako velo' vaa' ido' vene' daa' nene lamine' o neive. 10 Ido' vene' vemoho' lili' igi nizani' aleve nene lengikumu' ti' lo lo huko nolo-lingimuha a'mine nene neni' luvoni' gamazivo' nomive. Guvelesi ve'mo lo huko-lingidine' gamazi ve. A'mine gamazi nene ti' lo neive: Vene' ingine va'ningine huli-ngidi vamilizave. 11 Ne'mine o neine'za va'ningine ma huli-ngidilizani' nene ele'ninge ingine ve gohi malo' vami haza minilizave. Ido' haza mineso' ngisamiline' nene tine' mili gohi va'ningida alizave. Ido' va'ninge nete ele'ningine nene huli-ngidamilizave.

12 Ido' naza evene' linge mamu' Guvelesi ve'mi gamazi nomine' na'nise ti' lo noluve: Izesu' evenele zuho mali'mo Kilisito'nimu' gele ele'vole' ami vene' ma do neivo vanahosi bizi mini di vilisida a'mine vene' nene O'moso'mo do lamine' o-davosa elenaho Kilisito'nimu' gele ele'vole' amine' ne'mo vanaho gele ele'vole' o neine've nene ngelo do goloso o-damilido' mineleseinako nemu' elenaho aza a'mine velo' nene ha minelove nolivo ma a'mine vene' nene do hulo-damo ha do minelive. Ido' Izesu' evenele zuhouti' vene' mali'mo Kilisito'nimu' gele ele'vole' ami velo' vo neivo elenahosi bizi mini di vilisida a'mine ve nene O'moso'mo do lamine' o-davosa vanaho Kilisito'nimu' gele ele'vole' amine' ne'mo elenaho gele ele'vole' o neine've nene ngelo ma do goloso o-damilido' mineleseinako nemu' nene vanaho aza a'mine vene' nene ha do minelesuve nolivo ma elenaho aza hulo-do vamilive. A'mine Izesungumu' gili ele'vole' ama vadingesi ido' eledingesi nene O'moso'mo do lamine' o-ngedamaa' neine' neidiniko izipe gidilizani' nene O'moso'mi evenele zuho minami heta ato' ve minadine. Ne'mine o neiha do lamine' o-ngedaa' neine' aleve nizani' giline' ne'mo izipahatine nene O'moso'mi evenele zuhouti' nizave. 15 Izesu' zuho minamine' veneli'mo he ido' vemoholi'mo he vanahine nolihe elenahine nolihe hulo-delove nolivo ma O'moso'mo ezesi bizi minilisive lo hukamine' mo asi hongu li laminivo' minilizave lo neine' nenako ma volone nilavo ma nene a'minemu' o've li-ngidamilo. 16 Ne neiha Izesu' zuho minamine' elengaho nolihe vangaho nolihe a'minguti' mali'mo minelesive liline' nene O'moso'mo do u' izeli akalo' ele'mize molalibe nemu' gelamange. Mo hulo-damozo.

Laza Nene Guvelesi Ve'mo Igi Mili Minilizave Lo-lidine' Neukovo' Minelone Lo Paulo' Lo-ngimine'

17 Ido' Izesungumu' gele ele'vole' amine' vangaho nolihe elengaho nolihe nesi bizi minilisive lo O'moso'mo lo huko lamive lo lo-lingimuvoni' ma neine'za Guvelesi ve'mo lengi' hamo hamo' minevo' alevotine nene ne'mine mana'minesi minilizave lo lengele'mize molavo a'mine minevo' alevotinesi minikevo O'moso'mo elese molo-lengedo ei' ve lo lengele'mize molani' gameneu' minani' minevo' alevotine minine' ma'mino ha minivosa minilo. Ido' Izesu' evenele mulise ato ato' mini'mi monada nene ne'mine lo lo huko-ngedaa' nouve. 18 Ve ma Zuda veti noso mili-di oko'no lolovo huki-dikedo' O'moso'mo Izesu' zuho minelive lo ele'mize molavo ma a'mine Zuda veti noso mili-dani' nene do hulamoloseive. Ido' ve ma oko'no lolovo huki-damani' heta ato' ve minido' O'moso'mo Izesu' zuho minelive lo ele'mize molavo ma Zuda veti noso mili-nidi oko'ne lolovo huki-nidilizave lo lamilive. 19 Ne nanitekumu' ve. Okode lolovo huki-lidikevo minaa' nene haza inite' ve. Ido' okode lolovo hukamune' minaa' nesi nene haza inite' ve. Haza inite' neiha inite' gihile nene O'moso'mo lo huko-lidine' gamazi've gele daa' ne neive. 20 O'moso'mo elese molo-lengedo ei' ve lo lengele'mize molani' gameneu' lingine hamo hamolite minevo' alevotine gomu' minivo minani' ma'mino ha minivosa minilo. 21 Ido' evene' malite gei' okonga nene meni hizikevo engi' inite' ne'mine lolo' ogo goboni gono do-ngede'mo vo nanivo O'moso'mo ei' ve lo gele'mize molavo ma goboni ve naningumu' nene gopo gaka gelamo a'mingu' nene ha minezo. Ne neiha a'mine goboni gonouti' apaso viline' aka ma soto' o-gedavo ma a'mido' e'meteline' nene lamine' oloseive. 22 Ve ma evene' mali'mi goboni ve neivo Guvelesi ve'mo ei' ve lo ele'mize molaline' nene Satani ne'mi goboni ve mininguti' apase-dine' nenako ne'mo nene Guvelesi ve'mi evenele lolo' ogosa goboni ve minamine' gelave. Nemu' nene goboni ve miningumu' ve lo gopo gala gelamilive. Ido' a'mine'mine ogo ve ma goboni ve minamo neivo Guvelesi ve'mo ei' ve lo elese molo-do ele'mize molaline' a'mine ve nene Kilisito' goboni ve lolo' ogo mineleseive. 23 Ee, Izesu' aza minevo' alevo've hulo lengikumu' helo lengi' meni hizavo ei' inite've lili' ikeni' nizanaze. Nemu' nene misubou' alevete meni hizi-lingidikevo engi' goboni gono di-ngidi minamilo. 24 Ido' nemu' nene neze zuhokizo, O'moso'mo elese molo-lengedo lengele'mize molavo ma nene lingine hamo hamo' gomu' mini mili minani' minevo' alevotine malo' a'mido' nene O'mososi maka' maka' minilo.

Paulo' Aza Velo' Vamani' Ido' Vene' Damani' Alevemukisi Gevono' Minani' Nemukisi Lo-ngimine'

25 Velo' vamani' ido' vene' damani' alevemu' nene Guvelesi ve'mo gamazi lo huko lamivo na'nise'ne ga'ne giluvoni' gamazivo' ma lo-lengemelesuve. Ido' Guvelesi ve aza mulumo'ne ningo do nu' izo ei' gonolo' nele'mize molani' nenako gamazi lamine' lengi' lo-lengemelodo' gili nimilizadokovo' lisihe' o nouve losa gele nouve. 26 Nemu' nene ti' lo gele nouve. Idise a'mene api' ogo soto' o-lengede'mo novine' geni inite' ne'mi lulou' nizani' nenako nemu' velo' vami ido' vene' dami haza minani' aleve ingine minani' ne'mini hazavo' minilizani' nene lamine' oloseive losa gele nouve. 27 Ido' gaza veneka neivo ma nene naza vene' alamo mo hulo-delove lo gelamozo. Ido' veneka ma nomivo ma naza vene' vise' olove lo gelamozo. 28 Ido' vene' daline' nene goloso amoloseive. Ido' vene' alu mali'mo velo' viline' nesi goloso amoloseive. Ne neiha vene' vemoho' lili' ikeni' nete nene oko'ine losuvo'mi initekumu' geni engita soto' ilingumu' nene gilavo geni geni ivo minilisanako ne'mine geni nene lengita soto' ogalive lo gelo velo' vami vene' dami haza minilizani' alevevo' minilizani' nene lamine' ve lo noluve.

29 Neze zuhokizo, gamazi lo-lengemeloni' mene gililo. O'moso'mo molani' gamene naba nene mo alitave. Mo alitaze. A'minemu' nene di va'va' igi minilizani' o neinako lingine inite' gohi mamu' gili minavo a'mine gamene naba nemu' gatine molavo vene' vemoho' lingine vadinginemu' gilavo dizaa' neine' ido' eledinginemu' gilavo dizaa' ne'mo Guvelesi vemu' gilaa' nani' nene do leme-dalize. Vene' vemoho' lili' igi nizani' aleve lingine nene vene' vemoho' lili' igi minamani' evene' hamokovo' neine' gilivosa minilo. 30 Ido' evene' ma linginela mulumo alumo gelaa' inite' ma minavo ive nama iga' nave lingine nene ive nama amani' gilivosa minilo. Ido' ve ma lingine inite' mamu' longolize ize minaa' nani' aleve lingine nene ne'mine amani' gilivosa minilo. Ido' inite' maketi milaa' meni hizaa' iga' nave lingine nene henenitine nomine' nizani' gili minilo. 31 Ido' evene' ma me misubou' initeto' gono daa' nave ingine nene a'mido' lu'ine mili mini gono dani' gelamivosa minilizave. Me misubosi ido' a'mine misubou' inite' igi mili iga' nani' nesi nene osu' loloseinako nemu' gamazi mene noluve.

32 Gopo gatine gililiza inite' nene lengita minamine' minilizave losa gele nouve. Gohuno ve nete nene nanite' nanite' okunivo Guvelesi ve'mo mulunou' lamine' gelelihe li Guvelesi ve'mi initekumu' lu'ine mili gili minaa' naha 33 vene' di nizave nene gopo ga'ine gili nanite' nanite' okunivo venete lamine' gililizahe li me misubou' initekumu' lu'ine mili gili minaa' nave. 34 Ne'mine iga' nani' ne'mo nene lu'ine ga'ine se'ze lo minaa' neive. Ido' velo' olihe vamani' alu nete nene okodesi lutesi Guvelesi ve'mi initekovo' mino kekeize lo minelive li Guvelesi ve'mi initekumu' lu'ine mili gili minaa' naha velo' vi nizani' vene' nene gopo ga'ine gili nanite' nanite' okunivo vademote lamine' gililizahe li me misubou' initekumu' lu'ine mili gili minaa' nave. 35 Lengi' nene lengele'mize lamine' olove losa gamazi mene nolo-lingimuve. Lengi' vene' daa' ido' velo' vaa' akatine nene hize tile-lengedosa lamuve. Lingine gamene gamene lamine' vevesi mini lutine inite' malo' malo' milami lutine Guvelesi velokovo' mili gelekele' i-di minilizave losa noluve.

36 Ido' ve ma aza alungo ma izeni i-dikevo mino alinge' nene vene' damo haza minelove lo lo huko nolingu' a'mine izeni elenahine nene ma duvo lo lulo amuzo molo oteline' ne'mo a'mine alumu' lihime dani' geleleseinako eikumu' lulou' gilido' do molo a'mine alu nene daloseive. Daline' ne'mo goloso amoloseive. 37 Ne neiha ve mali'mo vene' mo damolove lo lo huko eze lulo amuzo molo gizebo ogavo vene' daakumu' lulo otamivo hazavo' minelido' lisihe' o neivo ma izeni elenahine nene haza gizebo o-do mino damiline' nene lamine' oloseive. 38 Nemu' nene ve ma aza izeni elenahine ma daline' nene lamine' oloseiha ve ma izeni elenahine ma damo minelidi'mo nene ivile' ogosa lamine' oloseive.

39 Vene' ingine va'ninge hilami ve'inesi minilizani' gameneu' nene va'ningine huli-ngidamilizani' o neine' nenako bizivo' minilisave. Ido' va'ninge hilikevo ve malo' volone lilizani' nene ha vilisaha a'mine vilizave nene Izesu' zuho minilizavelokovo' vilizave. 40 Ne'mine ilizani'za naza giluvoni' velo' vami hazavo' minilizani' nene lamine' minilisave losa gele nouve. Meve nene neni' gamazi neine'za naza giluvoni' O'moso'mi Sikalahu' nene nenita neivosa ei' gilido' hize ele' ogo noluhe losa noluve.